За поправка на оштетувањата на објектот на Македонскиот народен театар од протекувања дожд и од поплави, ќе требаат години. Ова го кажа министерот за култура и туризам, Љутков, при денешната обиколка на објектот на театарот , заедно со в.д. директорот Никола Кимовски. Причините поради кои оштетувањата на екстериерот и ентериерот на театарот не се санирани, Кимовски и Љутков ги адресираа на негрижата и на отсуството инвестиции од претходната власт, а министерот најави дека за тоа поединци ќе бидат повикани на одговорност. В.д. директорот рече дека е нехумано и небезбедно многубројната публика да престојува во таков објект.
- Негрижа во однос на нашата верна публика, која ја имаме секоја вечер во голем број, во нашиот театар. И навистина е нехумано и небезбедно да влегуваат во објект кој што се распаѓа. Доколку секоја година барем помалку се инвестирало, да речеме од левиот балкон, од десната тераса , да се поправат светлата, значи систематски да се работи, за самиот објект говорам, ние сега би биле во поинаков објект, рече Никола Кимовски, в.д. директор на МНТ.
- Систематски година по година, од 2017 година па наваму, продукциски се уништувала и инвестициски се уништувала институцијата. И не може сега да се очекува од нас дека во рок од шест месеци ќе можеме да направиме некаво чудо. Но, јас ветувам дека од година во година и во делот на инвестициите , и во делот на програмите, и со менаџери како што ги имаме денес, и како што рече директорот , ќе го разбудиме заспаниот џин, легнат покрај реката Вардар, кажа Зоран Љутков, министер за култура и туризам.
© 2020 Телевизија Телма. Сите права се задржани.
Овој текст не смее да се печати или емитува, во целина или во делови, без договор со Телевизија Телма.