Едночинката „Ѓоре Магаревски“ осум децении подоцна – битолскиот народен театар утре одбележува 80 години од своето постоење

Битолскиот народен театар утре одбележува 80 години од своето постоење. На 14 ноември 1944 година, само 10 дена по ослободувањето на Битола, е одиграна едночинката „Ѓоре Магаревски“ од Владо Малески, првата претстава на македонски јазик во слободна Македонија.

Оваа политички ангажирана претстава која се занимава со теми кои сè уште се актуелни – идентитетот, предавствата и лицемерието, утревечер повторно ќе биде поставена на сцената на битолскиот театар со наслов „Ѓоре Магаревски 80 години потоа“, во режија на тројца режисери, Софија Ристевска, Јовица Ристевски и Благој Мицевски, секој со свое видување на едночинката.