Македонскиот одбојкарски шампион Струмица славеше победа од максимални 3-0 против Фино Капошвар во рамки на првиот натпревар од првата нокаут рунда во ЦЕВ Купот. Новото засилување за струмичани, капитенот на националниот тим Никола Ѓорѓиев на своето деби уште еднаш го покажа својот квалитет.
Новите репрезентативни засилувања донесоа квалитет, а тоа веднаш се покажа вечерва на теренот во салата „Парк“ во Струмица. Македонскиот првак славеше во три сета и тоа со 25-19, 25-23 и 25-19. Победата можеше да биде извојувана со далеку поголема разлика во третиот сет, бидејќи струмичани имаа водство од 22-12.
Никола Ѓорѓиев со 18 поени беше најефикасен играч на натпреварот. Реваншот е во Унгарија за осум дена, а доколку струмичани успеат да го елиминираат Капошвар во втората рунда од ЦЕВ Купот ќе се соочат со турскиот Галатасарај.
За потсетување, нашиот тим ја почна европската одисија во Лигата на шампиони, но во првото квалификациско коло загуби два пати по 3-0 од Олимпијакос.
