Четврток е стандардно резервиран за натпреварите од Лигата на Европа и Конференциската лига. Денеска на програмата е 2.коло во Лигата на Европа, а прво во Конференциската лига.
Во фокусот на вниманието вечерва ќе биде дуелот помеѓу Порто и Манчестер јунајтед. Двете екипи на стартот не победија, Португалците загубија на гости кај Бодо/Глимт, додека англискиот состав пред своите гледачи на „Олд Трафорд“ одигра 1-1 со Твенте. Притисокот секако е на страна на премиерлигашот особено врз менаџерот Ерик тен Хаг, кој со уште еден неуспех би можел да заработи отказ со оглед на очајните резултати и во Премиерлигата сезонава.
Од останатите поинтересни средби, Тотнем има гостување кај Ференцварош од 18:45 часот, а во истиот термин Лацио ќе ја пречека Ница. Ајакс гостува кај Славија Прага, Бешикташ ќе се соочи со Ајнтрахт Франкфурт, Рома гостува кај Елфсборг, а интересно се очекува да биде и на пресметката помеѓу Глазгов Ренџерс и Лион.
Во Конференциската лига, Челси без дел од своите главни ѕвезди, кои не беа пријавени за натпреварувањето на „Стемфорд Бриџ“ го пречекува белгиски Гент од 21 часот. Македонските интернационалци Дамјан Шишковски и Бобан Николов со својот тим Борац Бања Лука ќе го пречекаат грчкиот состав Панатинаикос. Јагелонија на Дарко Чурлинов гостува кај Копенхаген, а од останатите поинтересни средби ги одвојуваме Фиорентина против ТНС, Легија го пречекува Бетис, а Хајденхајм ќе ги одмери силите со Олимпија Љубљана.
