Македонскиот одбојкарски шампион Струмица денеска го игра реванш натпреварот со Олимпијакос на гостински терен во рамки на квалификациите за пласман во Лигата на шампиони на ЦЕВ. На првата средба во Струмица грчкиот состав славеше со максимални 0-3.
Олимпијакос се покажа како преголем залак за македонскиот првак. Минатиот вторник Грците покажаа квалитет и заслужено славеа во три сета со 15-25, 17-25 и 15-25 за само 69 минути игра.
Ниту репрезентативните засилувања не беа доволни за нашиот првак да му се спротивстави на фаворитот. Денеска реваншот во Пиреја е со почеток од 18:30 часот, а патникот во втората квалификациска рунда е веќе познат. Струмичани ќе се обидат барем да го подобрат впечатокот од првиот натпревар и да одиграат подобар натпревар. Олимпијакос секако ќе продолжи во Лигата на шампиони и во 2.коло ќе се соочи со подобриот од пресметката помеѓу Гуагас и Бенфика, а на првиот натпревар шпанскиот состав славеше со 3-1.
Што се однесува до Струмица ова не е крај на европскиот пат, бидејќи нашиот тим ќе продолжи да игра во ЦЕВ Купот, каде ќе игра со поразениот од дуелот помеѓу Капошвар и Инсбрук.
