МЗТ Скопје ја отвори сезоната во АБА2-лигата со убедлива победа на домашен паркет против тимот на Теодо. Македонскиот првак славеше со 68-50.
Аеродромци доминираа на паркетот во „Јане Сандански“ од почеток до самиот крај на натпреварот. По првата четвртина беше 21-13, а на полувремето македонскиот состав водеше со 35-24. Гостите од Тиват за момент се заканија во третиот период кога намалија на пет поени разлика, но МЗТ брзо одговори и ја врати двоцифрената предност. Највисокото водство МЗТ го имаше со 23 поени, а конечниот резултат гласеше 68-50.
Војдан Стојановски со 13 поени и Марко Баковиќ со 12 го предводеа нашиот тим до победата. Во новиот формат во АБА2, МЗТ следниот натпревар во рамки на групата А го игра на гости кај Цедевита Јуниор на 10.октомври.
Сезонава уште два македонски тимови ќе играат во второто по ранг регионално натпреварување.
Работнички се најде во групата Б и во првото коло во четврток ја пречекува Сутјеска, а останатите ривали се Босна и Војводина. Пелистер пак е во групата Ц, а првиот натпревар го игра на 1.октомври во Битола против Широки. Останатите противници на битолчани во групата се Подгорица и Вршац.
Фото: МЗТ Скопје/Данаил Петровиќ