Новиот формат во фудбалската Лига на шампиони почнува денеска. Првата голема пресметка е помеѓу едни од најтрофејните клубови во елитата Милан и Ливерпул, кои го приредија и најепското финале во историјата на натпреварувањето.
Групната фаза е веќе минато во европскиот елитен фудбал, па веројатно ќе биде потребно време сите ние да се навикнеме на новиот лигашки систем на натпревари. УЕФА очекува повозбудливи натпревари, а според ждрепката веројатно и ќе добиеме повеќе дерби пресметки.
Првиот дуел што привлекува многу внимание е помеѓу Милан и Ливерпул. Седумкратниот европски шампион ќе го пречека шесткратниот првак. Овие два европски гиганти го приредија и најголемиот спектакл во историјата на финалињата на Лигата на шампиони. Во 2005 година во Истанбул, Милан водеше со 3-0 на полувремето, за Ливерпул да израмни на 3-3 во вториот дел. По многуте нереализираше шанси во продолженијата на „росонерите“, англискиот тим дојде до победата на пенали. Овие два тима се сретнаа и во финалето две години подоцна, но тогаш миланезите се реваншираа со триумф од 2-1 за седмата и засега последна европска круна.
Тоа беше историјата, а во сегашноста, двата клуба влегоа во новата сезона со нови тренери, Пауло Фонсека кај Милан, а Арне Слот го презема кормилот на „Енфилд“ од Јирген Клоп.
„Росонерите“ почнаа очајно во Серија А и дури во саботата во рамки на 4.коло го запишаа првиот триумф и тоа против Венеција на домашен терен од 4-0. „Црвените“ од другра страна пак тргнаа со три победи во Премиерлигата без примен гол, но викендов го запишаа првиот пораз и тоа пред своите гледачи од Нотингем Форест со 0-1. Во поновата историја овие два тима играа меѓусебе и во групната фаза во 2021 година и Ливерпул славеше два пати со 3-2 на домашен терен и со 1-2 на „Сан Сиро“.
Фонсека за овој натпревар нема да може да смета на Исмаел Бенасер, Алесандро Флоренци и Малик Чау, кои се повредени, додека во составот на Слот ќе го нема само Харви Елиот исто така поради повреда.
ФУДБАЛ ЛИГА НА ШАМПИОНИ
1.КОЛО
(18:45 ЧАСОТ)
ЈУВЕНТУС – ПСВ
ЈАНГ БОЈС – АСТОН ВИЛА
(21 ЧАСОТ)
МИЛАН – ЛИВЕРПУЛ
БАЕРН М. – ДИНАМО З.
РЕАЛ М. – ШТУТГАРТ
СПОРТИНГ Л. – ЛИЛ