Нашата писателка со словенечка адреса, Лидија Димковска, за романот „ Единствен матичен број“, во издание на „ Три“, е добитничка на наградата „ Роман на годината “ , што ја доделува Фондацијата „ Славко Јаневски“. Зад оваа одлука стои петчлено жири, со кое претседаваше ланскиот лауреат, писателот и академик , Влада Урошевиќ. Читајќи го образложението за одлуката, тој кажа дека романот на Димковска поседува обележја на актуелната стварност и мошне индивидуализирана посебност.
- Димковска се зафаќа да ја претстави , во сета нејзина трагика , едната од индивидуалните и колективните судбински состојби , толку карактеристични за нашата епоха: ситуацијата на егзилот. Присилното губење на татковината , на родниот дом, на делот од сопственото постоење , проникнато со безброј врски кои го спојуваат поединецот со неговото потекло, добива во романот на Димковска своја конкретна , мошне индивидуализирана посебност, рече Влада Урошевиќ- претседател на жири комисијата.
Пресреќна за наградата, Лидија Димковска кажа дека таа и е своевидна трета среќа, откако во минатото со романите „ Скриена камера“ и „ Резервен живот“, двапати била во потесниот избор . А , за наградениот роман „ Единствен матичен број“, рече дека е фикција која црпи од документаристиката.
- Во овој роман многумина ќе се препознаат затоа што , како што истакна професорот Влада Урошевиќ, во него постои онаа пустелија која што ние ја носиме и во себе. Меѓутоа и нашиот свет во глобална рамка се стреми кон таа пустелија. Се стреми слепо кон таа пустелија.Наместо да ја напушти , практично сака да се всели во неа, кажа Лидија Димковска- добитничка на наградата „ Роман на годината“.
Годинава наградата „ Роман на годината “ се доделува по 25 пат и сега го има своето важно значење, кажа извршниот директор на Фондацијата „ Славко Јаневски“.
- Моето чувство е дека станува збор за награда што ја сакаат луѓето. Награда што ја сакаат издавачите, награда што ја сакаат авторите, награда што ја сакаат читателите, рече Ѕвездан Георгиевски- извршен директор на Фондацијата „ Славко јаневски“.
Наградата се состои од плаќета, статуетка и паричен износ од 150 илјади денари, а ќе и биде врачена на Димковска во мај , на свечена академија во Драмски театар.
Сотир Трајков