По повеќе од две години застој, реконструкцијата на Универзална сала ќе продолжи следната седмица, кажа министерката за култура Костадиновска Стојчевска. За таа цел ќе се инвестираат 1 милион и 944 илјади евра. А, останува уште потпишувањето на договорот за банкарската гаранција.
- Веќе наредната недела изведувачот ќе почне таму да работи на објектот. Да го расчисти објектот и да почне веќе да гради затоа што ги имаме парите и ги завршивме сите други потребни процедури . И веќе е крајно време таму да започне работата, кажа Министерката за култура , Бисера Костадиновска- Стојчевска.
Презентирајќи ги резултатите од конкурсите за поддршка на проекти од национален интерес по области и активности, министерката кажа дека за сите одобрени проекти се издвоени 14 милиони евра што е за 1, 5 милион повеќе од лани. Од пристигнатите апликации, 2819 се прифатени, а 313 се одбиени од комисиите.
- Заради пријави во несоодветна дејност, непотполна документација , а во некои случаи наместо документ е приложен празен лист, кажа Костадиновска- Стојчевска.
Не се исклучува можноста за реакции на незадоволни апликанти, иако работиме транспарентно, дополни министерката за култура.
Поддржани се квалитетни, креативни и иновативни проекти, а од оваа година дејноста Креативни индустрии има нова буџетска линија. Заштитата на културното наследство и поддршката на младите уметници и годинава се меѓу приоритетите на Министерството за култура. Ќе бидат финансирани и значајни јубилеи и годишнини на истакнати личности од оваа област.
Сотир Трајков