„Леб и сол“ се несоборлив доказ за македонскиот идентитет, изјави претседателот Стево Пендаровски на свечената церемонија на одликување со ордени за заслуги на членовите на култниот македонски бенд.
Ордените, кои ги добија членовите на оригиналниот состав на „Леб и сол“, се дадени за оставени трајни вредности во македонската култура и нејзината афирмација во странство.
„Леб и сол“ изведуваат музика која е спој на рок, џез фузија и етно. Бендот е формиран во 1976 година, а постоеше до 1995 година, во состав Влатко Стефановски, Бодан Арсовски, Гарабет Тавитјан и Никола – Кокан Димушевски. Бендот повторно се собра во 2006 година и одржа турнеја во Македонија и низ регионот.
„Леб и сол“ објавија 11 студиски, како и албуми од настапи во живо и компилации.