Во рамките на иницијативата Отворен Балкан, во сферата на културата, вечерва во 20 часот во Културниот центар на Србија во Париз, ќе биде отворена изложбата „Супстрати“. Изложбата е замислена како меѓународна презентација на „ Отворен Балкан“ , а, на неа ќе се претстават визуелните уметници Кристина Пулејкова од Македонија, Нина Жељковиќ од Србија и Дриант Зенели од Албанија.
Куратор на изложбата е Клаудија Пецолд, која е основач на порталот за подигање на свеста за преобразба на природното и културно наследство „ Курирање на еволуцијата“, која се фокусира на современата уметност и ги нагласува основните врски меѓу трите земји, во рамки на „ Отворен Балкан“.
Изложбата „Супстрати“ ќе биде отворена до 12 август, а е организирана под покровителство на министерствата за култура на Македонија, Србија и Албанија. Со неа започнува т.н. проект „ Сезона на Отворен Балкан“, кој со различни содржини ќе продолжи и следната година во Културниот центар на Србија , во Париз.