Премиерот Димитар Ковачевски најави дека во наредните десет дена ќе иницира средба со лидцерот на опозициската ВМРО – ДПМНЕ, Христијан Мицкоски на која би разговарале за носење на одуки за интеграцијата на Северна Македонија и за усогласување на ставовите за односите со соседните земји.
– Првата тема ќе биде носењето на одлуки потребни за интеграција на Северна Македонија во ЕУ и второ, усогласување на ставови за односи со сите соседни држави на Република Северна Македонија, рече Ковачевски.
Одговарајќи на прашања за уставните измени, Ковачевски кажа дека очекува во понеделник предлог-иницијативата од работната група да биде во архивата на Владата и потоа дека ќе се најде на седница на Владата.
Прашан дали албанските партии ќе го поддржат предлогот имајќи го предвид нивното барање за бришење на „20 отсто“ од Уставот и да биде напишано албански јазик, Ковачевски рече дека многу јасни пораки дојдоа од претставниците на ЕУ и дека верува дека не само тие, туку и сите партии во Собранието ќе го поддржат предлогот.
Коментирајќи ги изјавите од ВМРО-ДПМНЕ за тоа дека нема да поддржат уставни измени и за наводна негова оставка, премиерот повтори дека тоа се фикции на лидерот на оваа партија Христијан Мицкоски, потенцирајќи дека единствен кој кажал дека ќе си поднесе оставка е самиот Мицкоски.
Претседателот на ВМРО-ДПМНЕ, Христијан Мицкоски, е подготвен во кое било време да разговара за националните и државни интереси на Македонија – велат од опозицската ВМРО-ДПМНЕ во врска со изјавата на премиерот Димитар Ковачевски во која тој пред медиумите кажа дека ќе го покани опозицискиот лидер на средба.
Но, освен за националните интереси, велат од ВМРО-ДПМНЕ, на средбата треба да се разговара и што ќе се прави по неуспешното спроведување на измените во Уставот.
Доколку постои желба за национално единство и слушање на гласот на мнозинството, прифаќаме лидерска средба на која, меѓу другото, треба да се види што ќе се прави во периодот по неуспехот на уставните измени и иднината на граѓаните која треба да се обезбеди, се наведува во соопштението на опозициската партија.