Тимот на Сан Антонио го доби правото прв да избира на годинешниот драфт во НБА лигата.
Тексашаните имаа само 14 проценти можност први да избираат играч и на крајот тие го добија џек-потот и правото од следната сезона во своите редови да го имаат најталентираниот кошаркар на денешницата 19-годишниот Французин, Виктор Вембанјама.
Младиот француски репрезентативец ќе биде дел од тимот кој го предводи легендарниот Грег Попович, а за кој своевремено настапуваше неговиот сонародник Тони Паркер.
Во минатото Сан Антонио имаше неколку шанси да ги избере најдобрите на драфтот откако во 1987 година на екипата и се приклучи Дејвид Робинсон, а десет години подоцна беше ангажиран Тим Данкан.
Вембанјама е висок 220 сантиметри и според сите медиуми тој е најпосакуваниот дебитант од времето кога во НБА влезе ЛеБрон Џејмс, а тоа се случи пред точно две децении.
Втори на драфтот што ќе се одржи на 22 јуни во Њујорк ќе избира Шарлот, а следуваат Портланд, Хјустон и Детроит.
Покрај Вембанјама меѓу оние кои високо котираат на драфтот се Скот Хендерсон и Брендон Милер.