Лионел Меси го напушта Париз по завршување на тековната сезона и на лето се сели во Саудиска Арабија, откако аргентинскиот ас го договори најскапиот договор во историјата на фудбалот. Француски АФП пишува дека зделката е „готова работа“, а останатите француски медиуми објавија дека Меси ја прифатил понудата на Ал Хилал според која ќе заработува 505 милиони долари.
Британски „Дејли Мејл“ шпекулира и со сума од 522 милиона долари, но нема никаква дилема дека Аргентинецот ќе го има „најтешкиот“ договор во историјата на фудбалската игра. На тој начин, Меси повторно ќе игра против Кристијано Роналдо кој веќе настапува за Ал Наср.
Меси е единствениот фудбалер со седум освоени „Златни топки“ во кариерата и, според многумина, е изненадувачки што прифатил да игра во Саудиска Арабија, наместо да се врати во Барселона или да направи трансфер на некое друго место во Европа.