Предлог измените на Законот за заштита на културно наследство, кои беа во пакет со уште осум други предлог измени на закони во насока на олеснување на процедурите за „Бехтел&Енка“, компанија на која ѝ се доверени изградбата на делници од коридорите 8 и 10Д, се повлечени од процедура во Собранието.
Измените требаше да се носат по скратена постапка. Но, под притисок на археолозите кои протестираа пред законодавниот дом, меѓутоа и поради негодувањата на неколку пратеници за начинот на кој се планирани да се донесат предложените измени, собранискиот спикер Талат Џафери информира дека предлагачите ги повлекуваат измените на Законот за заштита на културно наследство.
Претпладнево, пред почетокот на собраниската седница, пред парламентот се собраа археолози на протест и предупредија на штетноста од предложените измени со кои, како што порачаа, ќе се овозможи „легално уништување на културното наследство“.
Дел од нивните забелешки за предложените законски измени се однесува дека при евентуално откривање на наоѓалиште при градење на овие автопати, изведувачот за тоа ќе треба да го извести само надзорниот инженер, а не како досега, откритието да биде пријавено до надлежната јавна установа за заштита или до полицијата.