Откако поради повреда ги пропушти последните натпревари на националниот тим, Дарко Чурлинов се враќа во репрезентацијата. Проблемите со повредата се минато и тој е подготвен да им се приклучи на колегите на почетокот од квалификацискиот циклус за пласман на Европското првенство.
“Навистина се радувам и среќен сум што по подолго време повторно ќе бидам дел од македонската репрезентација. Изминатите месеци поради повредата на мускулот беа тешки за мене, но сега повторно сум во натпреварувачка форма и се разбира дека тоа сакам да го пренесам на репрезентативните предизвици кои ни следуваат”, изјави Чурлинов.
Првиот противник е репрезентацијата на Малта, која на хартија има статус на аутсајдер, но сигурно дека првиот дуел во Скопје ќе биде огромен предизвик за фудбалерите.
“За нас, почетокот на квалификациите е многу важен. Фаворити сме против Малта, но тоа треба да го покажеме на терен. Имаме сила, веруваме во себе и така ќе се поставиме. Ќе се обидеме да го пренесеме на терен тоа што од нас го бара селекторот. Некогаш резултатите се добри, некогаш не, но целта е што подобро да ја претставиме Македонија и да постигнеме најдобар можен резултат. Ќе дадеме се од себе во овие квалификации и верувам дека можеме да направиме голема работа”, заврши македонскиот репрезентативец во изјавата за ФФМ.
Натпреварот со Малта се игра на 23 овој месец во Скопје, а четири дена подоцна не очекува контролен натпревар со селекцијата на Фарски Острови.
ФОТО: Игор Паневски