Европската фудбалска федерација донесе одлука да им ги рефундира парите на навивачите на Ливерпул кои купија влезници за финалето од Лигата на шампионите кое минатата година се одигра во Париз.
Одлуката за враќање на финансиските средства доаѓа по извештајот на независната комисија која како главни виновници за хаосот што настана пред почетокот на финалето кое доцнеше 36 минути ги посочи токму УЕФА и француските власти.
“Ги земавме в предвид големиот број на информации кои се јавно или приватно објавени и сметаме дека нашата одлука е праведна. Изработивме шема според која парите ќе им бидат вратени на сите оние кои имаа проблеми при влегувањето на трибините”, изјави генералниот секретар на УЕФА, Теодор Теодоридис.
Според планот рефундирани ќе бидат парите за влезниците кои се купени за влезовите A, B, C, X, Y и Z каде беа пријавени најголемите инциденти, а тоа се сектори каде влегуваа навивачите на Ливерпул.
Во контингентот за поддржувачите на клубот од Енфилд имаше 19.618 влезници кои се продаваа по цена од 62 до 610 фунти.
Право да си ги добијат парите од влезниците имаат сите гледачи кои поради проблемите не влегле на стадионот пред 21 часот или воопшто немале можност да го следат финалниот дуел меѓу Реал Мадрид и Ливерпул.