Не стивнуваат реакциите по објавените резултати од годишните конкурси на Министерството за култура, за поддршка на проекти од национален интерес во културата. По првично искажаното незадоволство околу критериумите за распределба на средствата во издавачката дејност, Претседателството на Друштвото на писателите на Македонија одржа вонреден пленум на кој беше констатирано дека е скандалозно отсуството на адекватна подршката во оваа дејност.
Од таму реагираат и дека е неприфатливо одбивањето да се финансира манифестацијата „Празник на липите“, која го промовира дијалогот меѓу македонската и светската поезија.
Во интерес на транспарентноста и одговорноста при распределбата на буџетските средства, писателската асоцијација предлага преку интернет страницата на Министерствтото за култура на јавноста да ѝ биде достапен списокот на сите предложени книги за објавување, а не само имињата и насловите на избраните проекти.
Со отсуството на поддршка во Годинешната програма, дејноста на ДПМ оваа година е доведена во прашање, но како што рекоа од таму, нема да дозволат најстарата, најрепрезентативната и најмасовната писателска асоцијација, која постои и опстојува цели 76 години, да не го продолжи својот нагорен пат, кој е во неразделна врска со националните интереси.
Вчера на брифинг министерката за култура Бисера Костадиновска- Стојчевска не одговори дали ќе го ревидира делот од програмата што се однесува на издавачката дејност, како што побараа од Асоцијацијата на издавачи, туку апелираше тие што се чувствуваат оштетени да поднесат жалби до Второстепената комисија во рок од 15 дена по добивањето на решенијата. Според министерката, парите за проекти во сите дејности од културата за оваа година се во висина од 12, 6 милиони евра и дека комисијата за издавачка дејност ги поделила адекватно средствата со кои располагала.