Првиот голмански избор во составот на Тотенхем, Иго Лорис поради повреда на коленото ќе мора да паузира шест до осум недели.
Капитенот на лондонскиот прволигаш се повреди за време дербито против Манчестер Сити кое Тотенхем го реши во своја полза со 1:0 и тоа по судирот со противничкиот фудбалер Родри.
Веднаш по натпреварот лекарите не беа оптимисти околу состојбата со повредата, а тоа се потврди по деталните прегледи по кои е констатирано дека станува збор за сериозен проблем со лигаментите на коленото, но се уште постои надеж дека за негово санирање нема да биде потребен хируршки зафат што може дополнително да ја компликува ситуацијата.
Ова е сериозен удар за составот на Антонио Конте кој во овој период го очекуваат дуелите во Лигата на шампионите со Милан како и многу важни мечеви во Премиер лигата каде Тотенхем се бори за влез во елитното натпреварување за следната сезона.
ФОТО: Игор Паневски