На Владата не ѝ треба стратегија за привлекување на инвестиции. Странските компании сами го наоѓале патот до индустриските зони во земјава, а тоа го покажувале и бројките. Но, овој документ мора да постои, согласно законот на Влада, а сè уште не е донесен. Немањето стратегија и невклучувањето на активностите за привлекување инвеститори во приоритетите на Владата се едни од забелешките во најновиот извештај на државниот ревизор. Првиот човек на ТИРЗ, Деспотовски уверува – стратегијата ќе се донесе, иако лично смета дека нема потреба од тоа.
„Да, законот предвидува носење на стратегија. Во фаза сме на сериозни реформи на самиот систем. Иако, лично мислам дека не ни треба стретегија, имајќи предвид дека бројките покажуваат дека и ефектите се тука“, вели Јован Деспотовски директор на ТИРЗ.
Меѓу забелешките во извештајот на ревизорот и договорот за јавно приватно партнество кој ТИРЗ Тетово го има склучи со компанијата „Нормак“. Наместо на 35 години, колку што е зацртано во законот, тој е со период на важност од 96 години. Договорот е склучен во 2013-та година. Станува збор за конзорциум составен од четири норвешки и една американска компанија. Од ТИРЗ тврдат договорот не може да се раскине, но може да се скрати.
Во извештајот на државниот ревизор има забелешки и за државната помош. Не се овозможува целосен увид во вкупно доделената помош по корисник и истата се дава без проценка на исплатливост. Нотирано е дека основани се и зони кои не се функционални, а за кои се потрошени милиони. Дирекцијата има и 18 судски постапки, а во 12 предмети е тужена страна. Најголемите тужби против дирекцијата се за експропријација и тужителите бараат 2,7 милиони евра за имот кој бил искористен за слободните зони. Ревизијата е за периодот од 2015-та до 2021-та година.
Ирена Чачкова