Светска банка повторно ја намали прогнозата за раст на македонската економија за оваа година. Од 3,1 во јуни лани, ја намали на 2, 7 проценти во октомври. А сага банката прогнозира раст за годинава од само 2,4 проценти. Ова е далеку пониско од владините проекции во кои стои дека тој ќе биде 2,9 отсто, но приближно на оние на Народната Банка.
За Западен Балкан се предвидува раст од 2,5 отсто во 2023 година, наспроти првично проектираниот од 3,1 процент. Реформите за пристапувањето во ЕУ и инвестициите ги ублажуваат негативните ефекти од високите цени на енергијата и храната, како и нарушувањата на трговските и инвестициските текови и прелевањата од забавувањето во еврозоната. Сепак постои значителна политичка несигурност од парламентарни стопирања што би овозможиле доцнење на реформите и со тоа спречување на ефикасна апсорпција на поврзаните средства за Босна и Херцеговина, Црна Гора и Северна Македонија, проценува светска банка.
За домашните експерти ваквото ревидирање на стапката од страна на банката е очекувано. Економиите на европските партнери на земјава слабеат, домашните фирми се воздржуваат од инвестиции, а сѐ уште е голема и неизвесноста за тоа што ќе се случува со руско-украинскиот конфликт. Сепак, според експертите, Владата се помалку ќе може да интервенира со средства од буџетот, затоа што државната каса е истрошена.
Освен на македонската, Светска банка ги ревидираше проекциите за раст и на останатите економии во регионот. Хрватска се очекува да испорача најлоши резултати годинава. А економиите на Црна Гора, Босна и Херцеговина и Косово ќе бидат подобри од домашната.
- Хрватска 0,8 %
- Бугарија 1,7 %
- Албанија 2,2 %
- Србија 2, 3 %
- БИХ 2,5 %
- Црна Гора 3,4 %
- Косово 3,7 %
Во последниот извештај се посочува дека развиените економии и натаму ќе бидат на силен удар, кој пак ќе го почувствуваат и државите во развој. Главната причиина за тоа е продолжувањето на војната во Украина. Минатата година пак земјава ја заврши со најмал раст во регионот од скромни 2, 1 процент.
Ирена Чачкова