Конзерваторските центри кои се грижат за заштита на културното наследство имаат 12 исправни и 12 неисправни возила со кои може да ја извршуваат својата задача, стои во ревизорскиот извештај „Ефикасност на политики и мерки за заштита, управување и ревитализација на недвижното културно наследство” изработен од Државниот завод за ревизија.
Во двата скопски конзерваторски центри (национален и локален) имаат вкупно 14 возила, но исправни биле само 5.
Покрај тоа, буџетот за проекти за заштита на културното наследството изминатите 4 години постојано се намалува и лани бил на најниско ниво од само 99 милиони денари (32 % од вкупниот буџет за заштита на културното наследство) или околу 1,6 милиони евра.
Во институциите за заштита на културното наследство недостасуваат и стручни и професионални вработени, а државата дури лани презела мерки за формирање на кадар. Во Управата за заштита на културно наследство во периодот меѓу 2018-та и 2021-ва биле вработени меѓу 43% и 56 % од потребниот број на вработени.
-Наведените состојби на недоволна кадровска екипираност со стручен кадар влијаат врз извршување на основната функција и активностите за кои се формирани Националните Установи, како и организационите единици надлежни за недвижното културно наследство при Управата за заштита на културното наследство (УЗКН), како што е зачувување на културното наследство во изворна состојба, создавање на што поповолни услови за негов опстанок и ефикасна заштита на недвижното културно наследство, стои во извештајот на Државниот завод за ревизија.
Ревизорите утврдиле и дека планот на УНЕСКО за регионот на Охридското Езеро не се спроведува во локалната политика која прави несоодветни ДУП-ови за надградби во заштитените подрачја на градското јадро на Охрид.
Од Државниот ревизорски завод наведуваат дека не се доволни мерките и активностите за потребна заштита со што постои „реална опасност за трајно зачувување на недвижното културно наследство за идните генерации.“