Размена на креативни и добри енергии меѓу уметниците, наспроти негативните што ги разменуваат политичарите. Вака режисерката Ленка Удовички го опиша фестивалот на регионалната унија театри „ Рута група Триглав“, на кој од вечерва е домаќин нашиот Драмски театар. Фестивалот се одржува по 10 пат, а ќе започне со копродукцискиот проект „ Кој се плаши од Вирџинија Вулф“, на „ Улисис“ и Београдско драмско позориште, работен по текстот на американскиот автор Едвард Олби.
Тоа е нешто природно кон што тежат сите уметници , за таа некаква размена. Мислам дека тоа е и смислата на уметноста , да ги спојува луѓето , да се разменуваат креативни, добри енергии, наспроти сето она негативно што политиката го разменува. Се надеваме дека тоа ќе го има уште повеќе.- изјави Ленка Удовички- режисерка на претставата.
Претставата „ Кој се плаши од Вирџинија Вулф“ , Удовички ја режирала на барање на нејзиниот сопруг, славниот актер Раде Шербеџија, кој вечерва ќе настапи на сцената на Драмски, во ликот на Џорџ, по скоро 5 децении откако гостувал овдека со театарот „ Гавела“. Шербеџија не крие дека претставата е направена за да му биде партнерка особената актерка Катарина Бистровиќ-Дарваш, во ликот на сопругата Марта.
Сакав со неа да направам вистинска интеракција зашто тоа за мене е најубавото во театарот. Интеракцијата со партнерот или партнерката. Тука се случуваат чуда , тоа е убавината на нашата професија. И тогаш се сетив на „ …Вирџинија…“ А, Ленка ми рече не доаѓа предвид. Каква „ …Вирџинија…“, дали си нормален?-изјави Раде Шербеџија- актер.
Претставата зборува за средовечен брачен пар кој под алкохол разменува меѓусебни обвинувања. Ситуацијата ескалира до злоставување во кое е вовлечен младиот брачен пар, Ник и Хани, кои се поканети на гости. Во ликот на Ник , за прв пат на „ Рута“, настапува младата регионална ѕвезда Милан Мариќ, кој сподели прашања поврзани со улогата.
Што се меѓусебните односи, што е љубовта, што е всушност таа поврзаност. Што е тоа што го нарекуваме фасада во односот, а што е суштината. Олби тоа го пишува на феноменален начин.- изјави Милан Мариќ- актер.
Фестивалот „ Рута“ ќе трае до 19 октомври, а ќе прикаже уште 5 хит претстави од регионот.
Сотир Трајков