Во време на економска криза и мерки за штедење не треба да се заборави на улогата на науката и уметноста и тие треба да ја добијат заслужената поддршка, со овие зборови Џевдет Хајредини, претседател на одборот за државната награда „11 Октомври“ упати апел до надлежните институции за улогата на нашите творци, уметници и научници кои со своето научно и уметничко творештво се дел од тековите на европската, и воопшто светската наука и култура.
Тие трагале, давале и натаму ќе даваат попродлабочени одговори за актуелната стварност, отворените научни прашања и дилеми во нашето општество. Сакам да ја искористам оваа прилика за да апелирам досегашната и идните влади премиерите и министрите за финансии да не штедат кога станува збор за средствата од буџетот наменети за финансирање на науката, културата и уметноста, затоа што штедењето е во форма сега, порача Хајредини.
Сите ние тука сме проживеале повеќе човечки животи градејќи и создавајќи вредности, најпрво како индивидуален порив, а потоа и како придонес во општеството, забележа Мице Јанкуловски кој се заблагодари во име на годинашните добитници.
Човекот е социјално суштество и не може тој да гради вредни и индивидуални потфати, а сето тоа да не биде колективно добро. Има разлика само ако општеството во кое живее творецот не успева да ги препознае, а со тоа и соодветно вреднува неговите постигнувања, рече јанкуловски.
Наградата за животно дело во областа на науката му се доделува постхумно на проф.д-р Методи Чепреганов, невропсихијатар, додека за животно дело во областа на културата и уметноста годинашни добитници се поетесата Линдита Ахмети, писателот Томислав Османли и сликарот Мицко Јанкуловски.
Нина Стефанова