Отворањето на 21 издание на фестивалот на европски филм „Синедејс“ ќе биде со македонската премиера на долгометражниот игран филм „Мими“, во режија на Даријан Пејовски, на 7 јули, на кровот на ГТЦ.
Под слоганот „Од високо подобро се гледа“ од 7 до 14 јули, на фестивалската програма ќе бидат прикажани повеќе од 50 филмови, а „Мими“ кој е селектиран во SEE програмата ќе се натпреварува за една од наградите на „Синедејс“.
- Мими ги напушта своите родители, и болното минато од родното место, за да студира во Скопје. Ја запознава Сара – млада мајка со богат но насилен сопруг. Работејќи во киоскот на вујко ѝ, и како бебиситерка за Сара, Мими копнее по единственото што не може да го има – мајчинството, велат од МКЦ во соопштението.
Улогите во филмот ги толкуваат: Наталија Теодосиевска ( во насловната улога на Мими), како и Тамара Ристоска, Оливер Митковски, Петар Мирчевски, Сашко Коцев, Владимир Петровиќ, Стефан Спасов и др.
Даријан Пејовски е автор на сценариото по кое е снимен филмот. Дејан Димески е кинематографер, сценографијата е на Игор Тошевски, Емилија И.Атанасовска – костимограф, Ива Куробаса – шминка и фризура, Александар Пејовски е автор на оригиналната музика, монтажата е на Владимир Павловски, а дизајнер на звукот е Игор Поповски. Продуцент на филмот е Томи Салковски, а копродуценти се Дамир Терешак и Марко Јакимовиќ.
Филмот е копродукција на Скопје Филм Студио со Maxima film од Хрватска и Giggling goat production од Црна Гора, и истиот е направен со поддршка од Агенцијата за филм на Република Северна Македонија, ХАВЦ – Хрватскиот аудиовизуелен центар и Филмскиот центар на Црна Гора.
Годинешниот „Синедејс“ има многу изненадувања од домашната кинематографија сместени во различни селекции, но и богата Офф програма поврзана со македонската филмска индустрија.