Македонската ракометна репрезентација денеска по втор пат го совлада Кувајт на пријателски натпревар одигран во Маврово во рамки на подготовките за Европското првенство. За разлика од првата средба во понеделникот, кога славевме со 10 голови разлика, денеска момците на селекторот Кирил Лазаров мораа добро да се помачат за да дојдат до победата, бидејќи славеа со минимални 22-21. Голема минутажа повторно добија младите ракометари.
Македонија триумфот го обезбеди во последните 90 секунди од средбата, бидејќи гостинот водеше речиси цел натпревар. На полувремето беше 11-12 за Кувајт. Во вториот дел почнавме исто така па откако не постигнавме гол цели седум минути, гостите се одлепија на највисоки четири разлика или 11-15. Македонија потоа заигра далеку подобро, а пресвртот го направи во финишот, најмногу благодарение на голманот Мартин Томовски, кој најпрво одбрани пенал, а потоа и го спречи Кувајт во последниот напад да се избори за реми.
Младиот Игор Ѓоргиев беша најдобар во составот на Македонија со шест голови, Ненад Костески постигна четири, а Бојан Маџовски три. Томовски го заврши натпреварот со 8 одбрани и еден гол, додека Никола Митревски имаше шест интервенции.
Репрезентацијата и утре ќе тренира во Маврово и ќе ја заокружи првата фаза, а подготовките за Европското првенство ги продолжува во Скопје на 2 јануари.