Со кислородна поддршка, забавено движење и отежнато дишење дваесет и едногодишната Флора Гаши веќе две месеца е во исчекување на лекот Калидеко за кој вели дека без него не може да функционира. Гаши е една од трите пациентки во земјава со тешка форма на цистична фиброза. За нив лекот Калидеко значи живот.
Цело време зимам кислород. Три четири дена сум многу лошо и денес ќе одам на хоспитализација, затоа што не можам ниту да јадам, многу ослабнав и не можам да дишам, вели Флора Гаши.
Со солзи во очите Дијана Ѓорѓиевска која покрај цистична фиброза има и дијабет вели дека со овој лек и се регулирал и шеќерот и без терапија е неподносливо.
Ги молам да го набават лекот дека вака веќе не се живее. Сакам како секој нормален човек да работам да се движам да не зависам од никого. И на родителите им е мачно. Веќе 31 година имам и не сакам никому да бидам товар, вели Дијана Ѓорѓиевска.
Родителите со апел до министерот што поскоро да го добијат лекот и да го исполни ветувањето кое им го дал .
Го замолувам министерот како може да до донесе барем овие деца да се спасат, кои сега не можат ниту да одат, ниту со деца да си играат, ниту во училиште. Ова не е во ред.
За лекот Калидеко е одвоен буџет и е набавен преку Клиниката за педијатрија, но мораше да се почека извештајот на стручните лица дали тој лек има ефект кај овие пациенти, вели Филипче.
Почната е постапката и лекот треба да стигне следната недела. И тоа е причина зошто има една пауза во лекувањето инаку ние го обезбедивме лекот по навистина долг период затоа што за тој лек имаше потреба, изјави министерот Филипче.
Станува збор за лек што го прима една категорија на пациенти со дијагноза цистична фиброза, со една специфична генска мутација.
Нина Стефанова