Десетици илјади луѓе маршираа денеска во Минск и други градови во Белорусија, во продолжението на повеќенеделните масовни протести против власта на Претседателот Александер Лукашенко.
На улиците на овие градови распоредени се и повеќе полициски сили, кои ги блокираат приодите кон клучните владини објекти.
Полицијата соопшти дека уапсиле околу 250 луѓе пред демонстрациите, закажани под името Марш на хероите, затоа што носеле плакати и знамиња со навредлива содржина.
Протестите во Белорусија беа предизвикани од оспорениот резултат од претседателските избори од 9-ти август и бруталната полициска интервенција која следуваше по првиот јавно изразен револт заради сомневањата за фалсификат.
Луѓето кои протестираат бараат оставка од Лукашенко, кој цели 26 години е на власт во Белорусија, иако тој ги негира обвинувањата и тврди дека немирите во неговата држава се предизвикани од западните земји.
Најголем дел од опозиционите лидери сега се во притвор или ја напуштија државата. 66 годишниот Лукашенко вети дека ќе ја брани Белорусија по секоја цена и нема никаква намера да се повлече од функцијата.