Полицијата соопшти дека во дом во Охрид било најдено 11-годишно дете оставено напуштено од мајката. Детето е неподвижно, а случајот е предаден на надлежните социјални служби.
По 39-годишната мајка која го оставила синот без никаква храна и надзор се уште се трага, а охридската полиција најави дека ќе и биде поднесена соодветна пријава. Мајката исто така имала здравствени проблеми односно ментални нарушувања, потвдрија за Телма од полицијата во Охрид.
Министерството за труд и социјална политика соопшти дека детето е преземено од социјалните служби.
-Стручните служби и Меѓуопштинскиот центар за социјална работа во Охрид постапуваат во врска со случајот на 11-годишното дете со церебрална парализа. За детето е обезбедена соодветна грижа и сместување во мал групен дом, соопштија од Министерството.
11-годишното дете имало проблеми од раѓањето, а мајката која иако болна се грижела за него и често заедно со количка го шетала низ Охрид, а често била низ центарот каде просела. Помошта што ја добивала од граѓаните ја ставала на количката со детето и таа слика била секојдневна за охриѓани, но и покрај тоа досега социјалните служби ниту го забележале ниту им помогнале на детето и мајката.
Од полицијата велат дека и за мајката е потребна стручна помош на социјалните работници доколку биде најдена.
Пријавата за случајот била телефонска и тоа пријавувачот се јавил во полиција, а не во Центарот за социјални работи во Охрид.
Сега момчето е во групен дом, а социјалните служби најавуваат помош и грижа за неподвижното дете.