Полицијата соопшти дека актуелниот началник на СВР Струмица направил инцидент со службениот пиштол во канцеларијата во струмичката полициска станица.
Инцидентот се случил завчера околу 14:30 часот. Началникот Васко Тодоров бил сам во канцеларијата и зел да го чисти службениот пиштол.
Чистењето на пиштолот според процедурите се одвива откако ќе се извади магацинот и ќе се провери со репетирање за да не остане куршум во цевката.
При чистењето на пиштолот, според МВР оружјето испукало од невнимание, а заостанатиот куршум завршил во долниот дел на канцеларијата. Куршумот е најден зглавен меѓу паркетот и лајсната на ѕид во просторијата.
Нема повредени лица, а инцидентот поради пукање од службено оружје го истражува и внатрешната контрола на МВР.
Тодоров е началник на СВР Струмица како дел од 15-те назначувања, со закон дозволени на техничкиот министер Наќе Чулев во рамки на владата задолжена за спроведување на изборите.
По заминувањето на Чулев и престанок на мандатот завршува и функцијата началник на СВР за Тодоров.