Неколку илјади граѓани и вечерва протестираа во центарот на Белград, Нови Сад и Ниш. Луѓето одговорија на повикот објавен на социјалните мрежи со седење на улиците да се дистанцираат и издвојат од провокаторите кои синоќа ги предизвикаа безредијата и жестокиот судир со полицијата. Протестни прошетки биле одржани и во Крушевац и Врање.
Демонстрантите пред српското собрание истакнале и натписи со наслов “Не наседнувај на провокациите, седни” и “апси ги хулиганите, не го тепај својот народ”. Засега не се забележува големо полициско присуство, иако според медиумите, полициски кордон и коњица се распоредени во близина на парламентот.
Претходно, забрана за собирање на повеќе од 10 луѓе на отворен и на затворен простор, е една од трите мерки за Белград кои ги воведе Кризниот штаб, наводно со цел да се спречи ширењето на корона вирусот, но и како начин за справување со граѓанското незадоволство од режимот на Вучиќ.
Планот за најавениот полициски час беше повлечен, но демонстрантите синоќа во огромен број излегоа на улиците. На почетокот мирно, но брзо почнаа судирите со полицијата.
Полицијата со солзавец ги протера назад демонстрантите, кои откако се регрупираа повторно надоаѓаа, постојано фрлајќи камења, лопати и други предмети кон полицајците.
Стампедо настана во делот на булеварот кај црквата „Свети Марко“ откако таму полицијата испали голема количина солзавец, па демонстрантите побегнаа кон паркот Ташмајдан.
Резултатот од синоќешните немири се 19 повредени полицајци, и 17 демонстранти. Уапсени се десетици учесници. Од полициската бруталност не беа поштедени ниту новинарските екипи, кои иако уредно се легитимираа добија пендреци и искинати легитимации.
Министерот за внатрешни, на вонредна прес конференција се обиде да го релативизира насилството што полицијата го употреби.
Ужасни работи се случуваа. Полицијата и покрај тоа на многу нормален и рационален начи ја врати контролата на целиот простор, каде се случуваа насилните демонстрации. Преземаме посебни мерки и дејствија за граѓаните на Србија да имаат слобода, и да не дозволиме кој било насилник да ги малтретира, изјави Небојша Стефановиќ
За голем број аналитичари, полицијата треба да одговара, за начинот на кој се справува со демонстрантите. Многумина се сомневаат и дека Владата на протестите испраќа хулигани за да прават нереди и да предизвикаат судири.
Никола Илиевски