Изложба на босанската уметница Шејла Камериќ ќе биде отворена вечерва во Чифте амам при Националната галерија на Македонија. Изложбата е насловена „ Доаѓаме со подарок“ и ќе претстави рецентни и постари дела од Камериќ, која живее и работи на релација Берлин- Истра- Сараево. Кураторка на изложбата е Наталија Пауниќ.
Шејла Камериќ низ делата ги портретира жените, алудирајќи на познатите теми на радикалниот и социјалистичкиот феминизам, како и на пост- структуралистичките гледишта. Изложбата ги расветлува и обичните, секојдневни елементи и женски активности, со фокус на проблемите за кои обично не се зборува. Од тука е и насловот на изложбата, кој се огледа во изменетото централно дело – женска бела долна облека со панделка , која навидум е само украс, но нејзините издолжени краеви завршуваат меѓу посетителите на изложбата , кои се заплеткуваат во нив. На тој начин авторката прави деконструкција на родот, идентитетот, интимноста и сексуалноста.
Во рамките на вечерашното отворање на изложбата ќе се одржи и разговор со уметницата Камериќ, а ќе го води историчарот и теоретичар на уметност од Белград, Бранислав Димитријевиќ.
Изложбата ја организира КРИК- Фестивалот за критичка култура и ПРВО ПА ЖЕНСКО- Фестивалот за феминистичка култура и акција.