-По извршениот увид од страна на овластен градежен инспектор, постапувајќи по Законот за инспекции, утврдено е дека инвеститорот, Маркеза ДООЕЛ не врши градежни дејствија, туку се работи за оградување на плацот, кој е во негова приватна сопственост, соопшти општина Центар по денешната инспекција на Водно откако жителите во близина на ридот Големо Курило алармираа дека почна сечење на уште еден шумски простор на скопската планина.
Општина Центар информира дека ќе изврши консултации со засегнатите страни и дополнително ќе се разгледа проблемот и заедно со надлежните институции, Градот Скопје и во соработка со жителите ќе се бара решение за состојбата во овој дел од општината.
Секторот за инспекциски работи на Општина Центар излезе на терен, по реакциите на жителите од улицата „Питу Гули“ и околината, за наводен почеток на градежните работи на Водно, соопштија од општината.
Согласно инспекцискиот надзор, од општината соопштија дека е утврдено оти инвеститорот, Маркеза ДООЕЛ, поднел барање за издавање дозвола за градење на 17.12.2020. Градежната дозвола му е издадена на 7.4.2021, а станала правосилна на 8.6.2021 година, потпишана од поранешниот градоначалник на Општина Центар, Саша Богдановиќ.
Уште една шума на Водно падна пред пилите на градежните инвеститори