Во најновото издание на емисијата „Директно“, гледачите имаа ретка можност да го проследат гостувањето на Атанас Костовски, човекот чиј глас е врежан во меморијата на генерации љубители на спортот. Како спортски коментатор и новинарска легенда, Костовски со својата појава внесе посебна емоција во студиото, признавајќи дека самото враќање во просториите на телевизијата
предизвикало кај него силни чувства.
- „Благодарен сум пред сè на поканата, ме подмладивте за многу години,“ со насмевка започна Костовски, потсетувајќи дека неговиот пат во оваа зграда започнал уште на 14 декември 1964 година, кога бил учесник во првиот телевизиски весник на тогашната Телевизија Скопје.
Костовски со голем занос зборуваше за периодот поминат во телевизијата, кој траел до средината на 1986 година.
Тој откри интересни детали за изградбата на објектот каде што денес е сместена МРТ, нагласувајќи го колективниот дух на вработените.
- „Оваа зграда ја градевме и ја изградивме со наш голем придонес. Се откажувавме од надоместоци за годишен одмор за да ја подигнеме. Сега, кога сум тука, чувствувам дека моите колеги како да се потстанари во она што беше наша сопственост и речиси со наши пари го изградивме,“ истакна легендарниот коментатор.
Низ разговорот, Костовски се потсети на клучните моменти кои го дефинираа неговиот професионален пат. Првиот директен пренос го реализирал на 16 октомври 1965 година – легендарниот дуел меѓу Вардар и Црвена Звезда, кој завршил со победа на „црвено-црните“ од 2:0.
Сепак, освојувањето на просторот за коментар на македонски јазик во рамките на југословенската мрежа било процес кој барал трпение и квалитет. „Чекор по чекор го освојувавме телевизискиот простор и македонското спортско коментаторство. Првиот пренос на македонски јазик за југословенската фудбалска репрезентација беше на 3 мај 1967 година од Белград, на натпреварот
Југославија – СР Германија (1:0),“ се присети тој.
Како еден од најистакнатите новинари, Костовски беше сведок и на големите светски настани. Тој со прецизност се сеќава на 13 јуни 1974 година, на Светското првенство во Минхен, кога Југославија го победи Заир со неверојатни 9:0.
Посебен дел од неговото излагање беше посветен на Благоја Видиниќ, за кого Костовски смета дека е неправедно запоставен во сеќавањата на помладите генерации. „Благоја Видиниќ е најтрофејниот македонски спортист. Како голман има златен медал од Европското првенство, сребрен од Олимписките игри во Мелбурн (1956) и златен од Рим (1960). Тој е човек кој со своите достигнувања е меѓу најуспешните македонски спортисти на сите времиња,“ дециден е Костовски.
На крајот од гостувањето, Костовски се осврна и на конкуренцијата во тоа време, кога во југословенскиот етер доминираа имиња како Младен Делиќ и Владан Стојаковиќ.
- „Многу беше тешко за Македонецот во конкуренција на такви имиња. За нашиот
народ, секогаш поубава роба беше онаа од странство, па така беше и со
коментаторите. Требаше навистина да понудите нешто квалитетно за да ве
слушаат,“ заклучи „живата енциклопедија“ на македонскиот спорт.
Гостувањето на Атанас Костовски во „Директно“ беше повеќе од обично интервју – тоа беше лекција по историја, новинарска етика и љубов кон професијата која денес ретко се среќава.