Владата на денешната вонредна седница донесе одлука за продолжување на мерките за намалување на ценовните притисоци и заштита на животниот стандард на граѓаните до 1 јуни 2026 година.
Ова на својот фејсбук профил го соопшти министерката за финансии Гордана Димитриеска – Кочоска.
Со одлуката продолжува примената на намалените акцизи за горивата, како и намалениот ДДВ за бензините од 18 на 10 отсто.
Претходната мерка требаше да истече на 18 мај, но со новата одлука граѓаните и во наредните две недели ќе точат гориво по пониски цени.
Министерката посочи дека мерките се одговор на економските предизвици и нестабилноста на меѓународните пазари на енергенси.
Во понеделник истекува и попустот што компанијата ОКТА го обезбедува за бензинските станици, кој изнесува три денари за литар дизел и два денари за бензините.