Со инспиративни пораки за европската иднина на Македонија, надополнети со порака за неправдата која притоа и се прави на земјата, но и меѓупартиски навреди и кавги, беше одбележан 9 Мај, Денот на Европа во земјава. На централната свеченост пред Споменикот на ослободителите на Скопје, евроамбасадорот во Македонија, Михалис Рокас, рече дека Денот на Европа е ден кога мора да се подвлече стратешката важноста на проширувањето на Унијата, за да се обебеди долгорочен мир, просперитет и безбендост на континентот, но и геополитичка отпорност, зајакната енергетска независност и јакнење на заедничките европски вредности.
„И знаеме дека заедно со помошта на сите вас и со тековните реформи, ние ќе успееме да го направиме одлучувачкиот чекор напред за да ја донесеме земјата онаму каде што припаѓа, во семејството на Европската унија“, е пораката со која го заврши Рокас своето обраќање.
Премиерот Христијан Мицкоски, пак, рече дека европската интеграцијата е единствениот пат и иднина на Македонија, но оти солидарноста, вредноста и принципите врз кои е изградена Унијата. како идеја за обединување врз урнатините на Втората светска војна. не важат и за земјава.
„Постои горко искуство од многу откажувања, препреки и неразумни спорови на овој наш пат. Тоа силно и длабоко фрустрира, кога принципите се кршат токму врз грбот на оние кои бараат принципи и праведна шанса, исто како што обесхрабрува и рамнодушноста на многу големи држави кон овие неправедни епизоди за нашиот народ и нашата држава“, рече Мицкоски.
Мицкоски говореше и за македонската борба против фазимот не само како борба за слобода, туку како борба за своја држава и право да се биде Македоноц, велејќи дека тогаш Македонците и другите народи кои живееле тука ја избрале правилната страна на историјата. Тој алудирајќи на Бугарија, но без да ја именува, рече дека во тоа време имало и челници на народи кои не биле на правата страна на исторојата, туку биле окупатори, а не администратори. Тој побара од денешните водачи на тие народи да не бидат заглавени во историјата и да не се обидуваат да ги повлечат и другите со себе.
Денот на Европа беше искористен и за разменување на пораки и меѓу власта и опозицијата, полни со дисквалификации и меѓусебни обвинувања. Мицкоски, без директно да реферира на СДСМ, рече дека тие многупати ја одбиле понудената рака за обединување и не ги гласаат реформските закони, а се декларираат дека се за ЕУ.
„И нивното талкање низ таквиот простор се гледа и во променливоста и неконзистеноста на ставовите. Најчесто нивните ставови за клучните прашања се разликуваат од утро до пладне, а чести се случаите кога при очи се прават слепи, а при уши глуви. Политиката на кодошење на сопствената земја, таквите ги прави добри слуги на туѓи фактори, но не и пријатели на својот народ“, рече Мицкоски.
Лидерот на СДСМ, Венко Филипче, пак му возврати дека државата ја води организирана криминална група која сака земјата да биде во изолација и слепо црево на Европа, без спроведување на реформи.
„Се што кажува премиерот е само изговор, поради тоа што се зане што треба да се направи за да се почне со преговорите. Треба да се направат уставните измени. Што е за него обединувањето? – Да му дадеме поддршка да не ги прави, за да можат да продолжат да крадат? – Не, тоа нема да се случи. Затоа што ќе се случи Европа кога ние ќе дојдеме на власт после следните избори и сите ќе одговараат“, рече Филипче.
Инаку Филипче и делегацијата на СДСМ не присуствуваа на настанот, туку пристигна кога заврши официјалната церемонија и се полагаа цвеќиња на споменикот, избегнувајќи да застане на страната каде што стоеја претставниците на власта. На заминување, пак, премиерот Мицкоски помина во близина на Филипче и преставниците на СДСМ, но без да сврти глава кон нив.
Тамара Грнчароска