Се уште чади пожарот на отпадот во Визбегово, но е под контрола
Пожарникарски тимови се на терен во Визбегово каде вчера во огромен пожар изгоре отпад на автомобили на фирмата АСД Метал Груп. Пожарникарите се на лице место поради можно постоење на скриени неизгаснати жаришта на опожарената локација, ни изјави командантот на скопската противпожарна бригада Звонко Томески.
Пожарот се уште чади, но е под контрола. Во интервенцијата немало повредени, а еден пожарникар се пожалил на премор поради напорната инетревнеција под целосна опрема.
Бидејќи пожарот не е целосно изгаснат, не може да почне истрагата на надлежните. Првично беше пријавено дека пожарот избувнал од машина за сечење на железо и лимови, но сопствениците на отпадот вчера изјавија дека машината воопшто не била вклучена. Постојат сомнежи дека пожарот тлеел подолг период по што вчера одеднаш избувнал и се проширил на голема површина.
Густиот чад одеше и кон Скопје и населбите меѓу отпадот и главниот град. Во пожарот гореа стари автомобили, но изгореле и акумулатори, батерии, гориво и масло од хаварисаните возила кои биле одлагани во огромен висок куп на отпадот.
Фирмата АСД метал груп и тројца нејзини сопственици и управители во февруари беа обвинети откако во сличен голем пожар лани им изгоре отпад на локација во непосредна близина на вчерашниот пожар.
Миомир Серафиновиќ
(ВИДЕО) Нов огромен пожар на отпад за стари автомобили во Визбегово – на истата адреса гореше и лани