Поранешниот премиер и лидер на СДСМ, Зоран Заев објави дека поднел тужби за клевета и нарушување на честа и угледот против пратеникот од ВМРО-ДПМНЕ, Бране Петрушевски и д-р Жан Митрев.
„Поднесени се тужбите против Бране Петрушевски и Жан Митрев за клевета и нарушување на чест и углед. Не постои никаква дилема дека ќе се докаже лагата и на двајцата. Надоместокот од добиените тужби ќе оди за децата без родители и лицата со посебни потреби“, напиша Заев во објавата на неговиот Фејсбук профил.
Во фотографиите од тужбите кои Заев ги објави, од двајцата побарува штета по 500.000 денари.


Во објава на 8 февруари на неговиот Фејсбук профил, Заев ги демантираше трврдењата на Петрушевски и Митрев и побара од нив да се извинат во законски предвидениот рок, а доколку не го сторат тоа, најави дека ќе поднесе тужба и ќе се бори со сите правни средства како што напиша за да ја симнал оваа дамка од неговото име.
Инаку, Заев го тужи Петрушевски зашто во обраќање на прес-конференција го поврзал него со запленувањето на 10 тони марихуана во струмичко, а докторот Митрев за изнесени тврдења дека вршел притисок за купување на неговата болница.
Тужбите се поднесени до Основниот суд во Струмица.
