Поранешниот вицепремиер и висок функционер на ДУИ, Артан Груби, доби мерка 30 дневен куќен притвор со 24-часовен надзор, одлучи судија на претходна постапка при Основниот кривичен суд Скопје.
Одлуката е донесена по предлог на Јавното обвинителство, кое побара замена на претходно определената мерка притвор со поблага мерка за обезбедување присуство.
Откако утрово КПУ „Затвор Скопје“ го известил судот дека Груби од 09:20 часот е спроведен во установата и започнал со издржување на притворот определен со решение од 17 декември 2024 година – мерка што стапила во сила со неговото пронаоѓање и лишување од слобода – судот го известил Основното јавно обвинителство. По барање на обвинителството, била издадена наредба за негово спроведување пред јавен обвинител за сослушување.
Во текот на денот, одбраната на Груби доставила предлог за замена на притворот со куќен притвор. Предлогот бил проследен до обвинителството, кое доставило позитивно мислење, а јавниот обвинител на расправата предложил определување поблага мерка.
Судијата, по сослушување на осомничениот во присуство на неговиот бранител, донел решение за замена на притворот со куќен притвор со 24-часовен надзор, кој ќе го спроведува Министерството за внатрешни работи. Дополнително, изречена е и мерка на претпазливост – одземање на патната исправа и забрана за издавање нов документ за преминување на државната граница.
Против ова решение странките имаат право на жалба пред Кривичниот совет.
Груби е осомничен за проневера во службата во предметот поврзан со Државна лотарија, при што, според обвинението, е предизвикана штета од над осум милиони евра. Тој беше во бегство 14 месеци пред да биде лишен од слобода.