Агенти на американската Тајна служба убија вооружен маж кој се обидел да влезе во безбедносниот периметар на имот на американскиот претседател Доналд Трамп во Мар-а-Лаго на Флорида. Во моментот на инцидентот, Трамп се наоѓал во Вашингтон, заедно со неговата сопруга Меланија.
Според портпаролот на Тајната служба, осомничениот бил на возраст од 20-тина години, потекнувал од Северна Каролина и пред неколку дена бил пријавен за исчезнат од семејството. Попатно кон Флорида набавил сачмарка, во неговиот автомобил била пронајдена кутија со куршуми, како и канистер со гориво.
Тој успеал да влезе на имотот со автомобил, во момент кога друго возило излегувало од комплексот. Откако го забележале, агентите му наредиле да ги спушти предметите. Но, наместо тоа, како што соопшти полицијата на прес-конференција, тој ја подигнал пушката во позиција за пукање по што агентите отвориле оган и го усмртиле.
Соединетите Американски Држави се соочуваат со пораст на политичкото насилство. Трамп во два наврата во 2024 година беше мета на атентат, вклучително и оној на неговиот голф терен во Вест Палм Бич. Демократката од Минесота, Мелиса Хортман беше убиена со огнено оружје заедно со нејзиниот сопруг во 2025 година, а неговлку месеци подоцна беше застрелан и конзервативниот активист Чарли Кирк.
