Уставниот суд ги осуди нападите кон него и судијката Добрила Кацарска поради отворањето на предмет за линеарното зголемување на пензиите. Од судот сметаат дека се лаги и манипулации реториките кои ги користат дел од политичарите.
„Тезите дека „СДСМ преку Кацарска тргна во напад за укинување на зголемување на пензиите“ или „СДСМ преку Добрила Кацарска сака да ви го земе покачувањето“ се недозволиви и можат да создадат погрешна перцепцијата за работењето и постапувањето на Уставниот суд“, се вели во реакцијата на Уставниот суд.
Вчера судот донесе одлука дека треба да се преиспитува линеарно покачување на пензиите кое е за сите пензионери исто по околу 1.000 денари во два наврати. Известител на предметот е судијката Кацарска, но одлуката е на мнозинството судии. На ова реагираа пратеници од ВМРО-ДПМНЕ кои Кацарска ја ставија во корелација со СДСМ и обвинија дека таа сака да им го земе покачувањето на пензиите на пензионерите.
„Свесното пласирање манипулации претставува притисок врз судијата-известител и врз целата институција и опасен е преседан во случај кога некоја одлука не им одговара на политичките субјекти се прогласува за „партиска““, додаваат од Уставен.
Инаку измените на законот за пензии ги донесе мнозинството во собранието и почнаа да важат од септември. За судот е спорно тоа што сите пензионери добиваат исто зголемување без разлика на стаж, висина на пензија и придонесите кои се плаќани, туку сите пензиони. ВМРО ДПМНЕ уште при изборот на Кацарска за судија во Уставен не беше задоволна и обвини дека е награда за тоа што како кривичар осудила поранешни министри од партијата.
Билјана Николовска Тодорова