На социјалните мрежи се појавија фотографии за кои скопјани со право се загрижија, односно беше забележано масивно истекување на хемиска пена на јавна површина.
Согласно издадената наредба од Инспекторатот на Град Скопје, беше извршен вонреден инспекциски надзор на булевар „Александар Македонски“ во Општина Гази Баба.
Овластените инспектори на Град Скопје излегле на терен и направиле детален увид во состојбата, потекната од правен субјект што стопанисува во непосредна близина. Станува збор за сериозно нарушување на законските прописи и директно загрозување на животната средина.
Градоначалникот на град Скопје Орце Ѓоргиевски најави дека Врз основа на утврдената состојба и собраните докази, кон правното лице ќе бидат преземени најстроги санкциски мерки.
-Утре, детално ќе биде анализиран елаборатот за животна средина кој субјектот е должен да го поседува, за да се утврдат причините и евентуалните неправилности во неговите оперативни процеси. Врз основа на утврдената состојба и собраните докази, кон правното лице ќе бидат преземени најстроги санкциски мерки. Никакво отстапување нема да биде дозволено, секој што го нарушува законот, ја загадува околината и го загрозува здравјето на граѓаните, ќе се соочи со целосната сила на институциите, напиша Ѓоргиевски на Фејсбук.