Од Стопанската комора за Телма соопштуваат дека на вчерашниот состанок со претставници од министерството за економија и труд, од надлежните било побарано по завршување на новогодишната кошничка да нема поместување на цените во следните две недели. Од бизнисот посочиле дека ќе се преземе сè, без разлика што кошничката повеќе не е на сила, цените да останат на она ниво како за време на кошничката, а потоа повторно ќе се разгледува состојбата.
Од бизнисот на состанокот предлoжиле и кога ќе се формираат новите кошнички за следните празници, да се одберат најприоритетните производи, односно да се намали бројот на продукти кои ќе бидат дел од кошничката, а да се зголемат попустите. Побарале и да не влегуваат берзански производи. Исто така, сугерираат – ако има драматични промени на пазарите, наместо кошнички да се активираат стоковите резерви.
Од денеска повеќе не важи кошничката со која беа опфатени дел од продуктите кои еден месец имаа акциска цена. Тоа не беше мерка донесена со одлука на влада, туку со даден збор од страна на бизнис заедницата. Сега, надлежните го следат пазарот и цените дали ќе има нагло покачување по завршувањето. Ако дојде до тоа, ќе бидат принудени да воведат мерки од типот на замрзнување на цени и маржи.
Од Министерството за економија и труд соопштија дека се задоволни како минала акцијата – цените во декември се намалиле за скромни 0, 3 проценти.
Претходно кога се донесе кошничката, мерката се искомплицира со тоа што производите кои беа опфатени поевтинија за некој денар, но поскапеа оние кои не беа дел од мерката, па така Владата без можност за казнување ги предупреди да ги вратат цените за да не се воведат поригорозни мерки.