Расчистен и документиран е случајот со наводен обид за грабнување на ученичка пред училиштето „Страшо Пинџур“ во Општина Карбинци, информираа денеска од Министерството за внатрешни работи. Посочуваат дека по истрагата е утврдено дека нема елементи на кривично дело.
Пронајден е 20 годишникот кој според сведочењата на учениците барал да влезат во автомобилот, а на девојчето од деветто одделение го поканил и на кафе.
Веднаш по добивањето на пријавата полициски службеници излегоа на терен, преземени се низа оперативно-тактички мерки и дејствија во координација со Јавен обвинител од штипското обвинителство, извршени се разговори со лица кои биле сведоци на случајот во присуство на родители, но и со претставници на училиштето, а по преземени активности беше пронајден и 20-годишникот со кој беше извршен службен разговор во врска со случајот. Притоа, од сите реализирани дејствија и прибавени докази не се утврдени основи за постоење на кривично правен настан, се вели во соопштението од МВР.
Доказниот материјал ќе биде доставен до штипското Јавно обвинителство и Центар за социјални работи за понатамошна постапка.
Градоначалникот на општината Виктор Паунов во телефонски разговор изјави дека тие не се мешаат во работата на полицијата, но дека соопштението е премногу општо и не содржи детали за настанот, која била намерата на лицето да доаѓа во училиштето за време на настава, кој бил мотивот да им дава пари на учениците и зошто децата панично реагирале и случајот веднаш го пријавиле кај наставничката.
Викторија Димитрова Јованова