Македонските фудбалски клубови денеска ќе ги дознаат своите ривали во европските купови. Вардар го чека противникот во првото квалификациско коло од Лигата на шампионите, додека Шкендија и Силекс ќе ги дознаат ривалите во Конференциската лига.
УЕФА утринава ги објави можните противници на Вардар во првото квалификациско коло. Во полудиригираната ждрепка, македонскиот шампион се најде во групата 1 и, очекувано, нема статус на носител.
Можни ривали на „црвено-црните“ ќе бидат Шамрок Роверс од Република Ирска, КуПС од Финска, Линколн Ред Импс од Гибралтар, Рига од Летонија, естонскиот првак Флора Талин, Ларн од Северна Ирска и велшкиот шампион ТНС.
Вардар доби релативно полесен пат во првото коло, бидејќи во другите групи има далеку поквалитетни потенцијални противници, како казахстанскиот шампион Каират Алмати, романскиот првак Универзитатеа Крајова и босанскиот шампион Борац Бања Лука.
Првите натпревари од првото квалификациско коло во Лигата на шампионите се играат на 7 и 8 јули, додека реваншите се закажани за 14 и 15 јули. Ждрепката е закажана за 16 часот.
Во Конференциската лига, Шкендија има статус на носител и се најде во групата 5. Можни противници на тетовци во првото квалификациско коло ќе бидат Европа од Гибралтар, Малишева од Косово, УНА Штрасен од Луксембург, Пенибонт од Велс, Рунавик од Фарски Острови и естонскиот тим Номе Калју.
Силекс, пак, е неносител во групата 3 и го очекуваат силни потенцијални ривали. Кратовци може да се сретнат со Астана од Казахстан, ерменски Пјуник, Динамо Минск од Белорусија, грузискиот тим Дила Гори, а најпосакуван противник би бил Атлетик Ескалдес од Андора.
Првите натпревари од првото квалификациско коло во Конференциската лига се играат на 9 јули, а реваншите се седум дена подоцна. Ждрепката е закажана за 18 часот.