Народната банка со попесимистички прогнози за македонската економија во однос на владините. Годинава ќе се заврши со скромен раст од само 1,9 отсто и инфлација од 9, 5 проценти. Овие бројки се полоши од априлските проекции на банката. Владините пак пооптимистички. Прогнозираат раст од 2,5 отсто за годинава.
Според, проекциите на НБРМ економијата бавно заздравува, предупредуваат ако дојде до стопирање на мерките за замрзнување на цените, кои најверојатно ќе важат до крајот на годинава, но и зголемувањето на платите следната година, тоа може да биде нов притисок врз инфлацијата.
Ако имаме политики на агрегатна побарувака и тоа прекумерна, споредена со понудата во економијата може да преставува нагорен ризик за инфлацијата и затоа препораките се добро координирани и внимателни макроекономски политики, вели гувернерката на НБРМ Анита Ангеловска Бежоска.
Иако, има намалување на дефицитот, од НБРМ велат дека државата треба да внимава како се полни буџетот и како се трошат парите, затоа што јавниот долг е висок.
Јавниот долг е значајно зголемен во целиот регион и неопходна е консолидација, а таа може да се направи само преку намалување на буџетскиот дефицит, додава Бежоска.
Годинава се очекува намалување на дознаките од странство, активноста на компаниите, трговската размена, нарачките од странство. Подобри бројки домашната економија ќе генерира во следните години.
Во 2024 растот би бил околу 3 проценти, инфлацијата пак во следните две до три години треба да падне на 2 отсто.
Ризиците за глобалните економии ќе останат, главно заради конфликтот во Украина и новото жариште на Блискиот исток. Банскарскиот сектор е стабилен, Девизниот курс исто. Девизните резерви изнесуваат 3, 9 милијарди евра или 28 отсто од БДП.
Ирена Чачкова