Ако Македонија ги изгуби арбитражните постапки кои се водат пред Меѓународните судови, а произлегуваат од склучените меѓународни договори тогаш државата ќе треба да плати над милијарда и 330 милиони евра, открива Државниот завод за ревизија во последниот извештај за финансиското работење на владата со основниот буџет.
Покрај тоа државата само во 2021-ва за адвокатски услуги од странски правни друштва има платено 3,8 милиони евра. Постапките пред меѓународна арбитража се поведуваат за договори меѓу државата и приватни странски компании кога една од двете страни смета дека е оштетена.
Во периодот од 2018 до 2022 година во тек се пет арбитражни постапки за што од буџетот односно од парите за граѓаните се исплатени околу 15,6 милиони евра за адвокатски услуги.
Ревизијата укажува на потребата за утврдување на причините поради кои се покренати арбитражни постапки, со цел утврдување и иницирање на одговорност, стои во извештајот на ДЗР за основниот буџет и начинот како владата финансиски работи со парите на граѓаните.
