Халвор Гранеруд е победник на овогодинешното издание на турнејата „Четири скокалници“ во ски-скокови. Норвежанецот денеска ја потврди победата за време на последното натпреварување во Бишофсхофен.
Гранеруд ја оствари третата победа на 71-то издание на турнејата. Имаше скокови од 139,5 метри, односно 143,5 метри и со вкупни 313,4 поени триумфира на скокалницата во Бишофсхофен. Зад него финишираше Словенецот Анже Ланишек, додека Давид Кубацки беше трет.
Гранеруд е првиот Норвежанец со триумф на четирите скокалници уште од сезоната 2006/07, кога славеше Андерс Јакобсен. Оваа сезона славеше и на скокалниците во Оберсдорф и во Гармиш Партенкирхен. Во генералниот пласман на крајот Гранеруд финишира пред Кубацки, кој победи во Инсбрук, додека Ланишек беше трет.