Во новиот простор на приватниот културен центар „Лабораториум“, што се наоѓа во зградата на ССМ во Скопје, од утре (20 март) официјално ќе започне со работа филмското катче „ Фино кино“. Стартот е во 19 часот со проекција на филмот „ Нов бран“ на режисерот Ричард Линклејтер. Истата вечер од 21 часот ќе се одржи проекција на филмот „ Млади мајки“ во режија на браќата Дарден. Филмот беше награден на Канскиот филмски фестивал за најдобро сценарио.
- Нашата идеја е создавање на непретенциозно „џепно“ артхаус кино и нова културна платформа со внимателно курирана програма – иницијатива за која се надеваме дека ќе се претвори во жива неформална заедница, со филмската уметност во својот фокус. Интимниот простор на „Фино кино“ има соодветно и стандардизирано платно за филмски проекции (silver screen), а опремено е и со висококвалитетен 5.1 аудио сараунд-систем, велат од културниот центар „ Лабораториум“.
Филмот „Нов бран“ ќе биде прикажан и на 22 март од 20 часот. На програмата е и анимираниот филм „Арко“, кој имаше номинација за Оскар. Тој ќе биде прикажан на 21 март од 12 часот и на 22 март од 18 часот.
Од „ Лабораториум“ најавуваат по најмалку четири филмски проекции неделно.
© 2020 Телевизија Телма. Сите права се задржани.
Овој текст не смее да се печати или емитува, во целина или во делови, без договор со Телевизија Телма.