Поранешниот вицепремиер Артан Груби повеќе од 4 и пол часа е во скопското обвинителство откако утрово беше приведен на граничниот премин Блаце, по 14-месечно бегство.
Груби е осомничен за проневера во службата во случајот со Државна Лотарија кога подготвил и предложил одлуки на владина седница која била свикана како акционерско собрание бидејќи државата е сопственик на АД Лотарија. Според кривичната пријава, Груби и уште 7 други лица донеле одлуки кои се во надлежност на Управниот и Надзорниот одбор на Лотарија, а се однесуваат на купување на опрема о машини во вредност од над 8 милиони евра.
Од Обвинителството засега молк и нема информации за текот на распит, но најавено е дека по распитот Груби ќе биде однесен во Кривичниот суд кој му изрече мерка притвор во отсуство.
Груби утрово во 6:10 часот пристигна пеш на граничниот премин Блаце преку кој на 15.12.2024. ја напушти државата. Полицијата го приведе, а тој потоа беше спроведен во затворот Шутка од каде околу 13 часот е донесен во Обвинителството на распит.
Возилото на затворската полиција е пред гаражата кај МНТ, а Груби е спроведен преку влезот во ОЈО од гаражите.
Миомир Серафиновиќ